- Rruga "Muhedin Llagami", Objekti MD, Kompleksi Delijorgji, Tiranë
- info@ip.gov.al
Objektivi parësor dhe gjithëpërfshirës i reformës në fushën e inspektimeve është përmirësimi i klimës së të bërit biznes, si dhe zhvillimi i mëtejshëm i veprimtarisë dhe sistemit të inspektimeve në tërësi, së bashku me të gjithë komponentët e tij. Reforma synon të sigurojë mbrojtjen e interesit publik, forcimin e transparencës dhe rritjen e llogaridhënies në të gjitha nivelet e veprimtarisë inspektuese, duke ulur barrën administrative për bizneset dhe duke rritur profesionalizmin, efektivitetin dhe performancën e trupave inspektuese si në nivel qendror ashtu edhe vendor.
Garantimi i pavarësisë funksionale të inspektorateve realizohet përmes vendosjes së parimeve themelore të inspektimit, me fokus programimin e inspektimeve të bazuara në vlerësimin e riskut. Një komponent thelbësor i këtij procesi është ndërtimi i një kulture parandaluese dhe edukative, ku inspektimi i parë mbështetet në vendosjen e paralajmërimit si masë administrative kryesore, me synim këshillimin dhe parandalimin, e jo ndëshkimin e subjektit të inspektuar.
Një nga risitë kryesore të kësaj reforme është krijimi dhe funksionimi i Bordit të Inspektimeve si një strukturë e përhershme, bashkërenduese dhe orientuese e veprimtarisë inspektuese, në bashkëpunim me Inspektorin e Përgjithshëm. Ky mekanizëm përfaqëson një hap të rëndësishëm drejt përmirësimit të sistemit të inspektimit dhe sigurimit të një mjedisi më të rregullt, më efektiv dhe në përputhje me zbatimin e ligjeve dhe rregullave në Republikën e Shqipërisë në fushën e inspektimit.
Rregullimi i marrëdhënieve të punësimit të trupave inspektuese dhe ngritja e një sistemi meritokracie për rekrutimin dhe zhvillimin e karrierës synohet të realizohen përmes testimit, certifikimit dhe ngritjes së nivelit profesional sipas fushës përkatëse të inspektimit.
Inspektorati i Përgjithshëm do të garantojë një proces transparent për shqyrtimin e ankimit administrativ ndaj vendimit përfundimtar të inspektimit, duke shmangur konfliktin e interesit. Ky mekanizëm do të ndikojë pozitivisht në rritjen e besimit të subjekteve ndaj procedurës administrative të ankimit dhe pritet të çojë në uljen e numrit të rasteve që ndjekin rrugën gjyqësore, duke përmirësuar kështu efikasitetin dhe besueshmërinë e përgjithshme të sistemit të inspektimeve.
Vijojnë takimet intensive të Inspektorit të Përgjithshëm, z. Dashnor Sula, me Kryeinspektorët e inspektorateve shtetërore dhe drejtuesit e trupave inspektuese aktuale, të cilat do ti nënshtrohen ristrukturimit dhe riorganizimit të trupave inspektuese në inspektorate qendrore, në zbatim të ligjit për inspektimin nr. 99/2024.
Gjatë takimeve u theksua rëndësia e angazhimit të plotë të të gjitha strukturave aktuale dhe ministrive përgjegjëse në realizimin dhe finalizimin me sukses të kësaj reforme.
Ristrukturimi i inspektorateve ndodhet në një fazë delikate dhe vendimtare dhe për këtë qëllim Inspektorati i Përgjithshëm, përmes ngritjes së grupeve të posaçme të punës, do të ofrojë të gjithë asistencën e nevojshme për të garantuar mbarëvajtjen e këtij procesi, për krijimin e strukturave optimale në ushtrimin sa më efektiv dhe eficient të veprimtarisë inspektuese.
Gjithashtu, u bë e ditur iniciativa e Inspektorit të Përgjithshëm për ngritjen e një grupi paralel pune, i cili do të punojë për harmonizimin e strukturave dhe lidhjen e pagave, me pozicionet e punës, me funksione inspektimi, në të gjitha inspektoratet qendrore, me përfaqësues nga Inspektorati i Përgjithshëm, ministritë e linjës dhe strukturat aktuale inspektuese.
Një rëndësi të veçantë pati ritheksimi i faktit se, nuk do të ketë asnjë tolerim në lidhje me zbatimin rigoroz të detyrimeve që parashikon ligji nr. 99/2024 “Për inspektimin në Republikën e Shqipërisë” për të gjitha strukturat inspektuese. Zbatimi i plotë dhe i njëtrajtshëm i këtij ligji do të garantojë kalimin drejt një sistemi inspektimi të standardizuar, të dixhitalizuar dhe të planifikuar mbi bazë të analizës së riskut, duke rritur transparencën, efikasitetin dhe barazinë në trajtimin e subjekteve të inspektimit