Së bashku me Ministren e Ekonomisë dhe Inovacionit, znj. Delina Ibrahimaj, dhe drejtuesit e Inspektoratit Shtetëror të Punës, u zhvillua këtë të enjte analiza vjetore e Inspektoratit të Punës dhe Shërbimeve Sociale, ku u prezantuan rezultatet e vitit 2025, sfidat kryesore dhe prioritetet për periudhën në vijim.
Gjatë prezantimit u theksuan disa problematika që vijojnë të kërkojnë ndërhyrje të menjëhershme, përfshirë nivelin ende të lartë të informalitetit në tregun e punës, shkeljet e vazhdueshme në fushën e sigurisë dhe shëndetit në punë, si dhe nevojën për monitorim më rigoroz të marrëdhënieve të punës dhe të punëmarrësve të huaj, përfshirë edhe inspektimet në sektorin e medias.
Ministrja Delina Ibrahimaj vlerësoi angazhimin e Inspektoratit të Punës dhe Shërbimeve Sociale, duke theksuar rëndësinë e rritjes së efektivitetit të kontrolleve dhe ndikimit të tyre konkret në terren, si dhe domosdoshmërinë e forcimit të ndërgjegjësimit dhe llogaridhënies në mbrojtjen e të drejtave të punëmarrësve.
Në fjalën e tij, Inspektori i Përgjithshëm deklaroi se toleranca ndaj informalitetit dhe shkeljeve në tregun e punës ka përfunduar, duke kërkuar rritje të menjëhershme të përgjegjshmërisë institucionale dhe intensifikim të kontrolleve, si dhe duke paralajmëruar masa të forta ndaj çdo subjekti që shmang detyrimet ligjore apo cenon të drejtat e punëmarrësve. Ai theksoi se siguria në punë është një detyrim i panegociueshëm dhe çdo neglizhencë do të përballet me sanksione të rrepta.
Në vijim, Kryeinspektori i Punës prezantoi objektivat kryesore për vitin e ardhshëm, duke përfshirë forcimin e sistemit të inspektimit të punës, finalizimin e reformës së inspektimeve, avancimin e proceseve drejt integrimit europian përmes strategjive të qarta dhe të matshme, si edhe digjitalizimin e plotë të proceseve të inspektimit për rritjen e transparencës dhe efikasitetit.
